ما بين البينين

هو ده البين

تحذير:تحتوي هذه التدوينه على بعض الهيافات والقباحات.
ولأن نيتك وحشة افتكرتني هتكلم  عن (هيفاء) بنت وهبي ،لا يا سيدي ،أنا أقصد الهايفه التافهه ،مش هايفا الطويله المدملكه المزّة الفظيعه ...،ما علينا.
زمان وانا صغير ، قيمة خمس سنين كنت عيل بصباص وبتاع حريم -وما زلت- ، كان عندي نشاط يومي على الساعة 2:30 تلاته ال ، بتيجي المذيعه الحلوة بتاعت الفواصل الى مهنتها بطلت دلوقتي عشان تقول ونترككم مع الفيلم العربي ...وفيلم عربي على الفضائية المصرية من سنة 1996:1998 لا تعني إلا فيلم أبيض وأسود وفيه رقاصة ...لكن يظل السؤال..لما الرقاصة ترقص ، بتفتح بقها ليه .

بخلاف إن نفسي انزل محطه العرب (جسر السويس)الى بعد ألف مسكن وحيداً لا يتبعني أو يسبقني أحد من الأتوبيس أو الميكروباص أو حتى التاكسي ..إلا أني لقيتني والناس بيقولوا دائما (إسم المحطه) معاك يا أسطى..يعني رابعه معاك ، الإسعاف معاك ، مسكن معاك ، طلعة أكتوبر معاك ، ميدان لبنان معاك..لما آجي رايح الكلية  أقوله بعد الإشارة معاك يا أسطة عشان أنط صور جزيرة الشارع والى اكتشفت انو تمرين مفيد في الثورة للتمرن على كيفية نط حواجز شارع الجلاء الخضرا ومن ساعة الثورة والصور الحديد ما بقاش موجود والحمد لله فمباقش في إثارة فبقيت أطلع سلم المشاه ،،أيه التوهان ده ..ركز في (معاك)..البلد كلها مع السواق وساعات مع التبّاع الى يحب يقول بدلاً من معاك (أولك) أولك كذا.
 كلمة (معاك يا أسطى) ..يعني أيه معاك يعني ؟!، ورغم أنها أكثر جمل التوقف غير عقلانية  إلا أن جملة (على أي جنب يا أسطى )تسبقها في اللا عقلانية ، قال يعني ممكن السوّاق يروح يقف في الجنب الشمال بروح....


(ربنا يجعلها آخر الأحزان) أهو الدعاء ده بقى في حقيقة الأمر دعاء على الى بيسمعوا بإستثناء لو كان كل الى ممكن يحزن عليهم الشخص (المدعو له) ماتو ...لأن لو دي آخر الأحزان يبقى كأنو بيقولك ربنا يجعلها آخر الأحزان ويجعل يومك قبل يومهم فماتلحقش تحزن ، (البقية في حياتك) هل تعني تلك الجملة أن عمر المتوفي بيتوزع على الى بيستلموا العزا فبيكلموه عن الباقي فتبقى البيقة في حياتك ؟!  ، (شد حيلك )....هو الحيل بيتشد أزاي بقى ، ولو أتشد أوي ممكن يتقطع ؟!


(ما بين البينين)...شوفو بقى..أولا لما يكون في حاجتين بيبقى بينهم (بين) واحد يعني مساحة (واحده) ما بينهم .

يبقى لو في بينين يبقى ده بيتطلب تلات أجسام على الأقل
بين الجسم الأول والتاني (بين)
وبين الجسم التاني والتالت (بين)
يبقي (بين البينين) ده الجسم الى في الوسط ، الى هو أكيد معلوم ومعروف ، يبقى تقول الحاجة المعلومة الى في الوسط بدل هز الراس والايد في حالة عدم التأكد دي........ بدل ما أديك على سداغك .

دحّاح ، الكلمة دي بالنسبه لي حاجة محترمة ، يعني واحد شايف شغله كدا وبيشتغل بكل حواسه ، هي يمكن لها علاقة بالمذاكرة بس ..لو حاولنا نترجمها هنلاقيها nerd  بس أنا عايز أخليهاworkaholic  فيبقى واحد بيشتغل زي الطاحونه...ليه الناس بتنزعج من الكلمة دي؟.

بيئه ...atmosphere ....وهو كل ما يحيط بك
ليه بقى معناها حاجة دون المستوى؟ ...و(بلدي)..أما بلدي الى هي بلدي وبلدك وبلد شيخ البلد الى خلف ولد .. يعني حاجة دون المستوى أو مش نضيفه ، مش حديثة ، مش قوية ، مش وخيار ...المهم أنها مش حلوة...والحاجة الحلوة الى ممكن  تلتصق بالبلدي هي الفراخ البلدي ، البيض ، والبهايم عموما..بقى ده كلام ينفع؟! .

هزار البوابين..البواب أصلاً ما بيشوفش البواب التاني لأن كل واحد قاعد في عمارة ،ولو شافوا هيقعدوا يشربوا شاي.

ليه الى بيعملوا المسلسلات والأفلام مصرّين أن كل الناس بتشرب قهوة؟ ، مع أن أغلب مصر وأعمها بيشربوا شاي وفي كوبايه مش فنجان ، ليه مصرين أن في الجامعة تفااااااوت طبقي رهيب مع أن جامعة عين شمس مثلا كلها من شبرا والقناطر وعين شمس والمطرية والحدايق وشويه من المدن الجديده و حبه في مدينة نصر ومصر الجديدة ؟....مين بقى الى هيتعالى على مين..محدش فيهم معاه فلوس J ولو كانو معاهم فلوس كانو دخلوا جامعة أجنبيه ...تم بحمد الله الفصل الطبقي من زمان .
ليه لو بيصوروا في  أي كليه في جامعة عين شمس بيجيبوا العيال بيتمرقعوا عند قصر الزعفران ؟..حتى لو الطلاب دول في هندسة أو تربية أو طب أو تجارة أو صيدله أو ألسن أو حتى طب أسنان أو زراعه..مع ان محدش موجود في الحرم الرئيسي إلا حاسبات وعلوم وأداب وحقوق....ولو بيصورا في القاهرة يبقوا تحت القبه ؟ رغم أن كليات كتييييييير رؤية القبه بالنسبه لهم غير واضحة أو بعاد عنها تماما .
ليه دايما المعيد بيحب طالبه ؟ مع أن الحريم كتير.
ليه ستات مصر ما فيهمش محجبات في الأفلام ؟

حريم ونسوان
ليه الستات خصوصا في مصر بيتضايقوا من كلمة (حريم ونسوان ومره-إمرأه-) رغم انها كلمات كلها أنوثه...وبما أني وأمي صحاب أجرينا هذا الحوار لما سألتها ردت عليا وقالت
-كلمة مش كويسه
-قديمه دي ، أزاي يعني ..ماالرجاله ما بيحسوش أنها مش كويسه وطول النهار بيقولوها عادي على مراتتهم وصحباتهم ووحتى انثى الخرتيت.
-ما هم قلالات الأدب أصلاً ، كلمة مش كويسه لأ.
-أمال أيه صحاب وكدا..طيب مثلا عشان مرتبطة بشتايم قبيحه؟
-ممكن

-طيب ما كلمة أمك وأبن وأبوك كلها مرتبطة بشتايك وفي الشام الأخت بتنضم للقائمه..محدش بيعتبرها كلمات قبيحه ليه؟
-(صمت مطبق)
وفقدت الأمل

رغم أن كلمة حريم ونسوان تحديدا أحلى من كلمة ستات...أصل ستات تصف النساء في وضعيه الوقار فقط...يعني الرقه والجمال الجنوني والرغي الى بنحبوا كلو يتلغي من الكلمه عشان ما بيحبوش نسوان؟..وبعدين ستات دي يعني 50 وانت طالع ، وكلمة ستات فيها رجّه كدا شبه رجّة جسم الست العجوزة لما تقعد على الكرسي وتحدف جسمها في أرهاق..كلمة مستسته كدا..
كلمة بنات كمان حلوة بس مش ماشيه مع الى فوق 25 وتحت 40،،دول بقى يتقالهم حريم..أحلى حاجة ليهم حريم...والله كلمة جميلة فيها أنهم من الحرمات..حرمات الله ..الى لما يتعد على الحرمات دي ربنا يغضب .


*بالمناسبه دي..يعني أيه عليا الحرام من ديني

*لما تتجاب سيرتي في الشرشحه
يا (عووووووووومااااااار)عُــمر في صيغة نداء ، ليه نحن العمرين بيتجاب سيرتنا في كل خناقة نسائي بيفرشوا فيها الملائه لبعض..سؤال يستحق البحث..

المصيبة بقي أن عمر لو جيت تنده عليه بغير الصيغة دي من الشارع للبلكونه أو العكس ..أو ندهت عليه من بعيد هيجيلك كتمة نفس.
الأحتمال التاني أنك تمد بعد الميم وتطلع الكلمة (عُــمااااااااااااار)على وزن حُــماااااااار.


ولامؤاخذه.