تمعر وجهها حين أكتشفت سر اللـغـز ..بخط كبـيـر (لامــي) كـُــتب تحتها بخط اصغر "صـلاح سـوريـال" و "لنجتون عطـية".....ممممممم
سوريال هه! بالذمه ده كلام؟ سوريال ازاي يعني ؟ سوريال دي أسم بلد من البلاد الى بتيجي سيرتها على لسان توفيق عكاشه هي وسمنود باين ، وبعدين في حد عاقل يسمي أبنه سوريال .. سوووووريال . سووودولار ..سولار..سوووورق ووقع على الأرض ...ولا لنجتون ده كمان! الله يحرق ثانوية عامة.
هما باين كانو بيترقوا عليهم في المدرسه فقرروا الإنتقام من طلبة مصر كلها ، أزاي يسيبوا واحد اسموا كدا يألف كتاب لشباب زي الورد في مقتبل العمر ولا الجوز التانيين بتوع المعاصر....بس بتوع المعاصر مبلوعين .. مش أساميهم طبعاً لأ..مسائلهم هي الى مبلوعه.
ما علينا..
انا فاضــلــ(قلبت صفحتين)ــي ينهار بتناجني! 37 مسئله؟؟ليه بحضر الى اخترع التكامل؟بعد 24 مسئله يقولولي باقي 37؟
طلعت الموبايل من الدرج ، فتحت الفيس بوك ، 25 نوتيفيكشين و3 آد ريكوست ؟
مريم حاطه صوره ، الصوره طلعت نكته في كاريكاتير ، الكاريكاتير مش باين في الموبايل أبو شاشه منمنه الى يا رب يتسرق ويجبولي موبايل تاتش..
نعم! أسماء الكئيبه بتضحك؟علي الطلاق ده حدث ولا تسونامي..أزاي يعني دي اكيد حاجة مسخره مسخره يعني.
هي صحيح البت دي بتسمع اغاني حزايني كتير وعلى طول زي ماتكون معيطه.
هو الموبايل التاتش بيتعمل أزاي ؟..ازاي الشاشه بتحس بالدوس عليها كدا؟ هبة جابت واحد وأخوها دشهولها لما لقاها بتتكلم مع أحمد وكان باعتلها آخر مره أغنية تتجوزيني في لينك و ماعرفتش تفتحوا ياعيني عشان كانت موب.هو ليه الولاد بيرقصوا في الفرح عادي وأحنا بيبقى ما يصحش ؟...هو إن جينا للحق ما يصحش اكيد بس برده مفروض الولاد كمان ما يرقصوش .آخر مره لما المازيكا اشتغلت مسكت وسطي ورجلي بالعافيه وطلعت الطاقه كلها في التصقيف..الواد مصطفى ابن طنط أميرة كان بيرقص زي الغوازي (ابتسامه طويله)..ويقولوا علينا بنرقص بخلاعه..أنا هعمل فرحي ستات بس عشان ناخد راحتنا...هو الفرح الى بيبقى ستات لوحدهم ورجاله لوحدهم بيبقى فرح غلس ليه..هما بيشغلوا أغاني غريبه ساعتها ....أحلى حاجة في الأفراح انها بتكشف شخصيات المهابيل صحاب أخواتي..بنعرف العاقل من الطاقق ، الشيك من الأوفر ، الهادي والهايبر.....أصلا بقى أحلى حاجة في حوار الفرح ده يوم الحنه والفاستين الى بتلبسها البنات ..طبعا مش كلهم ..بتبقي في حاجات بيئه كدا ومبتذله ..بس دايماً الفساتين بتبقة أحلى من فستان العروسه نفسو..
سمعت نداء يأتي من عقلها الباطن من بشر تعرفهم حق المعرفة...جمل متداخله:شوفي مصلحتك ، شوفي الى وراكي ، شوفي حالك ، ذاكريلك كلمتين ينفعوكيييييييييييييييييييييي ، كل شويه تقومي من ع كرسي المكتب زي الفرقعلوز...لو كرسي المكتب بيقرص قوليلنا نجيبلك غيره..بيقرّص؟
قالت بحزم وقوه وانفعال لكن بصوت هامس لم تسمعه أذنيها..آيوه بيقرص وخانقني وبيزهق كمان.
قامت في عنف ، فتحت باب الغرفة في عنف ، هالها الهدوء الذي غرق فيه البيت ، مشت بخطوات هادئه واثقه نحو الممر المؤدي للغرفه الذي يقبع فيها الكنز ( اللابتوب )......لحظات صامتة، تخطت غرفة حازم وأحمد ، تخطت الحمام ،داخلين ع المطبخ يا أبلتي يلااااا.
تسمرت ، خرجت أمها من أمامها، من المطبخ ، يدها مبتله من أثر غسل الصحون وكأنها قتلت أحدهم بالداخل .
-علي في العزم إن شاء الله ؟
كانت الإجابة جاهزه لأن الكمبيوتر حق من حقوق الإنسان فإن لم ينفع الكمبيوتر .. فهنمشيها فرجه على "آخر كلام" ماهي مصر بلدي برده ولازم ادافع عن الثوار في البيت الفلولي ده..وماينفعش الواحده تاكل لأنها لسه ضاربه العشا من شويه..
-رايحههههههه..رايحه الحمام.
-والله ! رايحه الحمام بضهرك ولا أيه .
أيه الغبا ده..الحمام عدى...
-لأ طبعاً ، هشرب الأول .
*كتاب لامي هو كتاب خارجي للرياضيات بيقرف طلاب ثانوية عامة
*صلاح سوريال ولنجتون عطية مؤلفي كتاب لامي .
*مؤلفيت كتاب المعاصر هم جاويش واسحاق سرجيوس (كتاب رياضيات برده بس ما بيقرفش طلاب علمي رياضة) .
ليست هناك تعليقات:
إرسال تعليق